香港大學明年成為真正百年老店，噚日校長徐立之叫齊人馬，喺中山階影相，宣佈慶祝建校百周年嘅活動展開。徐校長同八方講，精采活動一浪接一浪，除咗一定有嘅晚宴同講座，仲會搵龍應台寫《港大故事》，郵政署又會推出港大郵票，玩足兩年。
港大有成百年歷史，全賴各界支持，早在1909年已經有公司捐款畀港大，呢間寶號叫乾泰隆，係香港最老牌華資進出口商之一，一出手就捐出600蚊，以當年一幢樓賣4,000蚊嚟講，600蚊算好多錢。最近有位歷史系校友在夜冷舖搵到呢張捐款收據（圖），上面寫明「如本大學興建不成，攜回此收條將原款送復」。