今年視帝視后由「醒哥」同「九姑娘」衞冕，兩人都唔再喺o靚仔o靚妹，證明演技呢家嘢，要好似名酒咁越耐先越夠醇。球技又點呢？呢幾年球壇都係咁由美斯、C朗、史奈達呢啲二十出頭當打球星領導，但有時睇番退役球王踢波，雖然節奏就慢啲，但嗒落先夠味！
由兩位球星朗拿度同施丹牽頭嘅「朗拿度施丹之友隊」，周二就到希臘雅典同當地班霸奧林比亞高斯，踢咗場名為「比賽對抗貧窮」慈善賽，為聯合國發展計劃籌款，仲要係呢系列慈善賽第8場。兩位球星開到聲，大把球星嚟到雅典支持，好似上一代就有朗奴迪保亞、雲邦賀斯、沙賓度、高華斯域等，當打嘅就有艾比奧爾、耶耶托尼、紐奴高美斯等。
朗拿度怕晒肚做觀眾
作為領軍人物，38歲嘅施丹當然義不容辭，穿上佢喺法國着慣嘅10號球衣，兼做埋隊長出戰奧林比亞高斯。貴為皇馬顧問嘅施丹，體型同瀟灑腳法跟當打時期完全冇走樣，5分鐘一次個人突破，引球推進接近20碼兼連過兩關，只係最後一腳射斜。施丹今場就冇波入，為朗拿度施丹之友隊梅開二度嘅就係前葡萄牙國腳沙賓度；不過最後主隊入番兩粒，追成2:2和氣收場。
今場就吸引咗超過3萬球迷入座，以上場喺葡萄牙士砵亭嘅慈善賽都籌到50萬歐元，今次相信都會唔少。踢咗70分鐘就退下火線嘅施丹，賽後就好感激各方好友：「我首先多謝每位嚟到嘅球員、教練、工作人員同觀眾，我知希臘嘅經濟唔係太好，成功完成比賽唔係容易。」施丹「弗」爆登場，反而另一個牽頭人物朗拿度，就全場着住便服做觀眾；以巴甲啱啱收「咧」，踢緊哥連泰斯嘅大哨，冇理由唔夠狀態。唔通34歲嘅佢驚打出個大肚腩相形見拙？