踏進2011年，已是周慧敏（Vivian）入行第25個年頭，她決定於明年3月19及20日於紅館舉行兩場紀念演唱會慶祝，不過老公倪震事前極力反對，事關5年前她為演唱會過度勞累，消瘦得只剩98磅，身形慘變「飛機場」，但她今次仍會全力以赴，希望與fans永遠記得這個日子。
周慧敏06年開過3場演唱會，當時對自己要求過高，任何事也想參與，變成緊張大師，負荷過重，結果身邊人亦受累，她說：「好想個騷成功，乜都想理，搞到個人好辛苦，嗰時瘦到得番98磅，變埋飛機場，不過佢（倪震）唔會介意我身形，最重要係我辛苦，作為身邊人都好肉赤，所以佢叫我唔好做呢個騷，工作係為興趣，能力範圍內佢都支持，大家講好咗，我會盡量去享受呢次演唱會，其他幕後工作唔會參與，畀佢睇到我嘅改變，實踐我嘅承諾。」
入行25年多得着
入行25年，她覺得印象最深刻的並非演藝事業上得到甚麼成就，而是結識到一班朋友，以及得到一班fans的支持，她說：「心態已經唔再係演藝事業帶來甚麼榮譽，亦唔係剛出道時以個人目標追求滿足感，作為藝人累積到社會感染力，呢樣係一份給予，我由86年參加業餘DJ大賽得到亞軍，呢個25年得來不易，小朋友都可以大學畢業，我本身有好多個身份，廣播界、電影、電視、唱歌都做晒，層面算好廣泛，好多香港人都睇住我成長，呢份情好特別，我喺度諗點去慶祝我入行25年，歌手形象大家應該係最深刻，希望大家一齊同我度過呢個moment。」
佩服劉德華魄力
她相信再過5年，已經沒有這份魄力再舉行演唱會，Vivian說：「所以我好佩服劉德華，工作永遠第一位，大家個價值觀同追求嘅嘢都唔一樣，家體力仲得，30周年應該唔得啦！趁住呢個日子，全力以赴，為自己留一個美好回憶。」
採訪：魯萍攝影：葉君海
化妝：GrichaChan
髮型：NicholYip
場地：蘭桂坊酒店（九如坊）
