港股噚日早段窄幅上落，晏晝番嚟玩大插，恒指下跌455點，報收22975，插落嘅原因係歐豬債務危機惡化，不過都係搵嚟講，要插都唔會由港股先插起，應該係大戶趁市靜殺啲牛證就真。
花旗股市反覆偏好，道指前晚報收11476，上破11500關可以帶動港股大反彈。聯儲局唔加息已經預咗，會後聲明同上次差唔多，不過就好強調失業率同埋聯儲局兩個責任──維持經濟增長同控制通脹，言詞間好脗合之前話要「推高通脹以刺激經濟增長」嘅策略。
海螺C輪25087：安徽海螺（914）報收36.25元，升2.1%。股價月初由100日線反彈上破50日線，隨後現技術調整，呢兩日又推高，成交仲大增，有機會炒上42元，可以諗吓隻C輪25087。
隻輪現價33.5仙，2011年3月29日到期，行使價37元，溢價11.3%，引伸波幅47.1%，槓桿率10.8倍（有效5.6倍），正股上升42元，25087睇70仙，正股跌穿34.80元就沽咗隻輪。
俊樺