史提芬周喺《食神》度有句金句：咁易俾你估到，我就唔係食神啦！其實，今屆英超都有一樣嘢好難估，就係邊個領隊會走人，因為幾乎次次都大熱倒灶，反而啲黑馬分子就跑出咗，好似布力般流浪嘅領隊艾拿迪斯喺前日就無端端被炒，認真估佢唔到。
大熱格蘭依然健在
猶記得喺今個球季未展開前，人人都睇死韋斯咸領隊格蘭會係喺新球季第1個離隊或者被炒嘅英超領隊，點知到咗家，韋斯咸的確喺聯賽包尾，但格蘭就仍然健在；反而阿士東維拉嘅奧尼爾就成為今屆首位離隊嘅領隊，而帶紐記回升英超兼深得民心嘅曉頓，仲喺月初（6日）成為咗今屆首名被炒領隊！點知，市場都未消化曉頓被炒單嘢，喺周一，布力般流浪又公佈炒咗領隊「大儍」艾拿迪斯，原因咪就係佢教得差，球隊目前只得21分排第13。
不過，早輪布力般賣盤成功，兩位新老闆印度嘅拉奧兄弟，仲話支持艾拿迪斯，又話會科水畀佢喺1月轉會窗重開後買人，所以當曉頓被炒後，外界仍睇好艾拿迪斯個位置好穩陣，佢當時嘅離隊賠率仲有成34倍咁好分；但言猶在耳，拉奧兄弟以同艾拿迪斯理念唔同為理由（實際係戰績差），艾拿迪斯結果喺周一晚同球會拜拜，而且據聞有部份人士早就收到風，所以艾拿迪斯被炒前一晚突然急劇起票，離隊賠率得番4倍。
執和味分手費可轉新工
好彩，天無絕人之路，因為據聞獲布力般最高賠償150萬鎊嘅艾拿迪斯，將會接替格蘭，為韋斯咸掌帥（即係格蘭俾人傳咗咁耐，終於炒得）；另外，英格蘭國家隊領隊卡比路亦曾點名指「大儍」有能力接替自己，所以亦有傳佢可能會稍作休息，然後執教國家隊。
至於布力般新帥個位，目前大熱人選係早前同阿積士和平分手，兼曾經教過熱刺嘅祖爾，賠率只得3.5倍；其餘嘅熱門人選，仲有奧尼爾、古比士利同埋曉頓等，甚至連阿根廷名宿馬勒當拿，都話有可能執教呢支西北部球隊呢！不過，有傳布力般班想用番英國領隊喎。