【本報訊】天主教香港教區榮休主教陳日君樞機首次開腔回應早前引發滿城風雨的「魔鬼論」，狠批本港地產商「賺到盡」，又指教區聲明提到富商李嘉誠會繼續資助明愛「唔係好明智」，暗撐提出「魔鬼論」的羅國輝神父。陳日君大罵富商「好牙擦」，動輒以「不在香港投資」作威脅，但香港是最容易賺錢的地方，「你試吓（撤資）吖，你後悔呀﹗」記者：張嘉雯
教區神父羅國輝早前公開批評地產商李嘉誠是「魔鬼」，引發李氏關注，教區事後不但沒有力挺羅國輝，更發聲明表示「遺憾」，又指李嘉誠會繼續支持明愛的工作，令教會內外譁然。陳日君昨日出席香港記者協會午餐會時被問及此事，最初他拒絕回應，指事情已經「越講越亂」，經多番追問後才表示教區聲明有問題：「肯定唔係好明智啦，唔使講都得o架呢句說話。」
澄清對有錢人沒成見
陳日君澄清，天主教會對有錢人沒有成見，但不屑發財者動輒以撤資作威脅，不信他們敢於撤資，「發財係好事嚟o架，咁但係你發財都要謙虛啲，有啲發咗財呢仲好牙擦喎，話香港人時時說三道四，『我不如去第二度投資啦』，我話：『你敢？你試吓吖！你試吓吖，你後悔呀！呢度最容易賺錢o架嘛，係咪先？』」
他解釋，教會內講求分工，有人負責「鬧交」，有人負責「做事」，主教可為原則放棄眼前利益，但前線人員或要為窮人利益而妥協，「如果我喺明愛做嘢，我都會小心啲啦，唔會得罪幫助明愛嘅人啦，但係如果我做主教我可以唔使理，我當唔知」。問到若他在位是否可避免同類事情發生？他答：「唔好比較，唔好比較，人比人比死人o架。」
「魔鬼論」事件爆發後，身兼明愛總裁的副主教楊鳴章曾與李嘉誠通電話，有傳他曾向李道歉，李嘉誠則承諾事件不會影響他對教區的捐款；教區則發表聲明，對魔鬼論引致李嘉誠不快表示遺憾。主教湯漢至今未有正面回應，只表示會為事件祈禱。
批評地產商「賺到盡」
陳日君又主動提到事件其中一名主角李嘉誠：「嗰位先生呢，有時都有機會見面o架，佢話『主教呀，有乜嘢事開口啦。』我從來唔開口嘅，我驚呢開咗口我就以後唔可以講嘢，我情願唔開口喇。」他認同香港地產商「賺到盡」，年輕人無法安居「好凄凉」，指是制度使然，政府要負很大的責任。他又笑言出家人住屋由教會照顧，「但係後生仔就好辛苦，成世都要住公屋」。
對於代母產子，陳日君相信大部份人都感到「好唔妥」，全球多國法律亦不容許，「一個正常人嘅成長係需要爸爸媽媽」。但代母產下的小朋友友沒有媽媽，他認同需要法律禁止同類做法。