朴智星，一個相貌平平的南韓球員，近年不但在星光熠熠的曼聯站穩陣腳；周一更在英超榜首大戰中，由他頭槌一箭定江山，主場1:0擊退阿仙奴，助紅魔重返榜首。星仔累積4度射破兵工廠大門紀錄，除成阿仙奴剋星，更猶如曼聯的星中之「星」。
朴智星射破阿仙奴大門已不是新鮮事，上季聯賽曼聯作客大勝3:1，星仔攻入第3球；當然今仗入球的重要性，比上次交手的錦上添花更高。41分鐘他接應翼鋒拿尼右路中腰傳中，巧妙地彎腰側額頭槌攻門，皮球呈拋物線笠死首度在英超上陣的年輕波蘭門將施捷斯尼，曼聯亦因此入球，令阿仙奴嘗到今季第2場聯賽作客敗仗。
「那是個不尋常入球」
29歲的星仔，今季並沒受世盃後遺症影響，而以隊長身份領南韓打入世盃16強後，個人更具信心；今季在各項比賽已為曼聯貢獻6個入球，打破05年加盟曼聯後單季入球紀錄，領隊費格遜說：「他對阿仙奴的紀錄一向很好，那是一個不尋常的入球，反映他的狀態極出色。」
遺憾是星仔完成12月26日的比賽後，就要回到南韓國家隊出戰亞洲盃，料缺席7場紅魔比賽；星仔心情矛盾說：「我對亞洲盃有雙重感受，以我目前的狀態，我當然不想離開；不過我在國家隊也責任重大，而且每次代表國家也是榮譽。」
費Sir驚訝朗尼宴客
曼聯贏波後以16戰34分重返榜首，更添下周日作客車路士之戰的信心，費Sir說：「對車路士是大戰，但視為決定冠軍之戰就言之過早；不過我們已16場不敗，我有信心不敗場數增至17場。」不過紅魔陣中仍有人斯人獨憔悴，73分鐘拿尼右路個人突破推入禁區，阿仙奴左後衞基捷基治滑倒後意外手觸皮球，球證判罰12碼，不過朗尼主射卻高出。費Sir失望說：「這不是他以往的風格，以前他都能中框，這令我很驚訝。」而另一前鋒貝碧托夫更失望，上仗他對布力般流浪獨建5功，今仗卻全場坐在後備席，只能欣賞隊友獲勝。綜合英格蘭外電
《花絮》
碧咸睇波撐旺奧脫福
碧咸離開曼聯經已有7年，但係依然仲咁受紅魔球迷歡迎。前晚佢都有去奧脫福幫母會打氣，旺吓佢哋，仲喺開波前同班智利礦工影相留念。開波之後佢坐喺觀眾席，同曼聯後衞兼死黨加利尼維利一齊睇波，期間不時有球迷問佢攞簽名同叫佢一齊影相，而佢都照單全收，真識撈。
智利礦工好腳頭
皇馬喺10月尾請班智利獲救礦工去巴拿比奴睇西甲，結果佢哋就大炒桑坦德6:1。好橋自然多人抄，曼聯亦照辦煮碗，喺前晚對阿仙奴場大戰，邀請班智利礦工嚟奧脫福做嘉賓。班礦工先喺星期日同紅魔名宿卜比查爾頓食晚飯，而且仲獲贈紅魔波衫，然後再喺周一晚入場睇波。話時話，班智利礦工先後幫皇馬同埋曼聯打氣，最終兩隊都贏波，睇嚟佢哋都好好腳頭。
林伯狂操12碼抗魔
杜奧巴喺上場英超射失12碼，搞到車路士唔能夠作客反勝熱刺2:1。嚟緊下星期日車路士會喺主場大戰曼聯，而喺熱刺場波長唞完復出嘅林柏特，就話喺養傷嗰3個幾月都冇練過射12碼，所以會喺呢幾日苦練番，等到時大戰紅魔時，有機會大派用場。
蘇斯克查獲紀念牌匾
曼聯為咗表揚喺奧脫福比賽14年、家陣喺挪超莫迪執教嘅名宿蘇斯克查（右），就喺對阿仙奴場大戰開波之前，由領隊費格遜親手致送個牌匾畀佢。個牌匾係由蘇斯克查嘅比賽相片組成，當中包括99年歐聯決賽入致勝球後嘅慶祝場面，可謂記載咗佢喺紅魔嘅光輝史。