冇幾耐之前，有大學生話女友唔嫁無殼蝸牛，引起全城譁然，但原來唔只佢一個想買樓，大把後生仔女都覺得喺香港地冇層樓揸喺手，好冇安全感。煲呔「御用智囊」智經研究中心上兩個月做咗個調查，發現有五成七受訪青年，未來10年最想做到嘅係買樓或者改善居住環境。呢班青年由16歲至35歲都有，即係中學生都想買樓。
近半年輕人想移民
智經理事伍穎梅同八方講，啲後生仔咁想買樓，係受社會價值觀同環境所影響，阿媽阿爸為有瓦遮頭勞碌奔波，所以都會勸仔女儲錢買樓，唔好做無殼蝸牛，調查結果反映父母嘅訴求。調查發現，受訪者年紀越大，越覺得要解決住所問題。唔知係咪俾阿媽「哦」得多，更加想買樓。
有近半受訪者話會考慮未來10年移居其他城市，當中近八成半話係為咗追求較佳生活質素，越高學歷就越想移居海外。八方對結果毫不詫異，皆因外國樓價相對冇香港咁高，喺香港供樓，供一世都供唔掂，仲未計樓價嘭嘭聲咁升，政府九招十幾式冇乜效，高官出口術亦冇用，施政報告提出嘅置安心計劃遠水不能救近火，居屋已死，想置業又唔想做房奴嘅香港人，可能要移民才可以圓業主夢。
要設更多互動平台
智經主席胡定旭對呢個調查結果有另一睇法，佢話年輕人想去第二個國家、城市住吓冇乜問題，因為可以有多啲國際視野，然後回饋社會，唔一定會造成香港人才外流。伍穎梅幫手解畫，話家嘅年輕人價值觀多樣化，冇單一政策可以照顧到佢哋唔同嘅需要同埋期望，所以社會應該要正視年輕人訴求，港府要設立更多互動平台，好似Blog，社交網站等等，畀年輕人參與更多政策諮詢同埋制訂工作。佢話好欣賞特首喺facebook設立「上亞厘畢道」頁面，畀年輕人都可以向佢反映意見，八方認為，高官應該站出來面對群眾，匿喺網絡世界隨時閉門造車，適得其反。
mailto:[email protected]