【本報訊】中央千方百計阻止劉曉波領取諾貝爾和平獎，天主教香港教區榮休主教陳日君樞機早前撰文狠批中央的做法「無恥」，他昨日補充，北京威脅各國杯葛頒獎禮是不尊重其他國家，做法「肉酸」，有違國際慣例，又笑言：「好彩我唔係中國政府，唔係都好難堪。」
「個獎畀得好啱」
陳日君昨日出席記協午餐會後表示，認同諾貝爾委員會的評審結果，「個獎畀得好啱，佢（劉曉波）和平爭取民主、爭取進步，好符合和平獎準則，可以鼓勵全球用和平手段去爭取民主嘅人，就算佢唔可以領獎，都可以畀大家好多鼓舞」。
他又指中央政府「好難做」，「如果畀佢（劉曉波）領獎咪即係認錯？」但他認為中央可更高明，「至少可以唔好做得咁肉酸囉，應該可以大方啲……唔使阻咁多嘢，用各種手法抵制呢件事，對其他國家都唔尊重囉，威脅人哋唔好去」。
他相信劉曉波獲獎，長遠對推動中國民主改革有幫助。