今年係聖雅各福群會成立60周年，呢個扎根灣仔做服務嘅機構，見盡呢個全港最富貴地區內最貧窮小市民嘅苦況，聖雅各福群會星期五舉行慈善晚宴，邀請多個名人設計波鞋當晚義賣，義務設計師包括陳淑莊，佢嘅設計主題係「愛．同行」，話大家活在花花世界，日日營營役役，應該珍惜身旁嘅愛人、家人、朋友，愛才能隨着大家共同嘅步伐印記在人生路上。
八方都知，設計概念通常好抽象，講都未必明，所以大家只要記得做善事就得，呢啲義賣波鞋每對底價5,000蚊。講到捐錢，都係馬會豪氣，據講會捐出1.38億元畀聖雅各福群會，資助堅尼地道服務新大樓重建，由於重建工程浩大，所以仍然差8,000萬元先籌夠錢埋單，八方希望唔係因為關愛基金累事啦。