民建聯立法會議員陳鑑林前日宣佈，聯同其他「香港龍獅節」合辦機構明年元旦喺尖沙嘴舉行大型巡遊，一炮過出動1,111獅頭同兩條身長228呎嘅金龍，挑戰新加坡08年353隻舞獅嘅健力士世界紀錄。
「4條1」好日子
呢場大龍鳳能否成事係未知之數，撞正當日結婚嘅胡先生卻好忐忑，佢同八方講，如果呢個活動成事，可能打亂晒佢大好日子，事關當日朝早11點起，廣東道、北京道同海防道可能會封路，直至下晝4、5點先解封。
胡先生計劃下晝4點坐遊艇喺尖沙嘴碼頭上岸後，先去一趟文化中心同前香港水警總部「1881」留倩影，約4點半坐的士去奧海城準備註冊同擺酒，家隨時多成千頭獅爭路，令佢大叫好頭痕：「會唔會冇的士？使唔使兜大圈？」
頭痕嘅應該唔止胡先生，婚禮統籌師歐小姐話，唔少情侶一早mark定明年元旦結婚，貪當日「4條1」夠特別。伊甸園婚姻見證服務公司負責人都話元旦個期好爆，近30對新人將於當日下晝喺尖沙嘴分店註冊，想去巡遊路線一帶影相要預好時間，結婚搞到裙拉褲甩就唔好啦！