港台一月七號會喺科學園搞「第三十三屆十大中文金曲」，噚日就率先喺科學園公佈今屆金針獎得主係葉蒨文（沙麗）。沙麗上台講感受，話好開心同好感激，仲多謝老公阿Lam（林子祥）幫佢開始咗佢嘅音樂事業，嗰時寫咗《零時十分》畀佢，阿Lam仲係佢老師，沙麗亦多謝以前唱片公司嘅黃柏高。
唔清楚係乜獎
大會請咗梁漢文同王菀之分別送咗高爾夫球波同羽毛球畀沙麗。沙麗受訪時話，初初知道攞呢個獎好驚訝，都唔清楚係乜獎，但覺得好光榮。問沙麗咁快手攞金針獎會唔會太年輕？佢講笑話：「我覺得我已經上咗年紀。」
噚日着透視衫現身嘅沙麗fit爆，但私下就好怕醜，用件披肩遮住。佢話頒獎禮當晚會表演八至十分鐘，唱自己嘅歌，因為好耐冇去頒獎禮，心情好緊張，但未知到時阿Lam嚟唔嚟。
記者話沙麗事業線勁過啲o靚模，佢話：「我汗都出埋嚟，以前就有本錢，領獎時件衫會以尊重為主。」沙麗話雖然有心癢，但未諗開演唱會，佢又勸勉新人最緊要做番自己，唔好模仿人唱歌。王菀之話好鍾意沙麗嘅歌，沙麗搞笑話：「你知我係邊個咩？」梁漢文就話受沙麗影響好深，之前作咗兩首歌同《零時十分》有關。
孖朱玲玲睇波
此外，上周三下晝四點幾，沙麗約埋佢位羽毛球波友朱玲玲一齊睇香港羽毛球公開賽，幫中國靚仔組合蔡贇同傅海峰打氣，結果蔡贇等不負眾望贏波。
