已擁有平治跑車及Jeep等靚車的張智霖（Chilam），日前又偕老婆袁詠儀（靚靚）到銅鑼灣買新車。不過，Chilam今次並非選購數百萬或數十萬的貴車，而是購買靚靚喜愛、約值16.4萬港元的Smartfortwocoupe來冧老婆，認真識做。
張智霖與太太袁詠儀大前日穿上黑色情侶裝，乘坐司機駕駛的七人車抵達銅鑼灣利園商場，二人直踩入附近一間MiniCooper專門店。
恩愛逛街
Chilam走進專門店後，表現雀躍地不停睇車，但靚靚完全提不起興趣，蹺埋雙手站在一旁等他。有見老婆大人興趣不大，Chilam在店內兜圈後便急急腳拖住老婆離開，雖然Chilam與靚靚結婚多年，但二人仍手拖手行街街，十分恩愛。
靚靚一邊拖住Chilam逛行，一邊講電話，之後二人走到附近的仁孚車行睇車。不過已擁有兩部平治的Chilam今次並非睇貴價車，而是揀選僅得兩座位的Smart。
靚靚詐嬌
靚靚甫見陳列室內的Smartfortwocoupe，即嗒晒糖般與Chilam打開車門左睇右睇，又上車試坐，然後跟店員密密斟。店員將一份Smart的單張交予Chilam後，靚靚隨即跟Chilam詐嬌說：「你唔覺得好得意咩？」之後二人問店員新車何時到埗，似乎已準備扑槌購買。二人跟店員密斟一輪後，Chilam即看一看手錶，靚靚則心急地說：「咁耐o架！」然後與Chilam拍住拖離開。
採訪、攝影：楊浩賢