內地公佈了高於市場預期的通脹數據後，發改委即聲稱通脹應已短期見頂，預計12月的數據將會回落。本欄曾提及昨日大市的表現是關鍵，因為可以睇到投資者究竟選擇相信，還是始終對通脹不放心，驟眼看來，中港兩地投資者的態度頗有分別，昨天A股由頭升到尾，內地投資者似乎相信將會有段蜜月期。但港股卻只以陰燭收市，可見本港投資者戒心較重，比較保守，而大市成交亦縮至600多億元，可見有很多投資者其實都是觀望為主，唔係太敢落注。
唔只投資者，話唔定中央領導人對之後的施政方向都冇十足把握。剛過去的中央經濟工作會議，以「積極穩健、審慎靈活」為明年宏觀經濟政策定調，簡單來說，即係唔會好似前兩年咁寬鬆，但太緊又怕影響經濟，都係要睇形勢行動。
持股博粉飾櫥窗
既然大家都冇明確方向，股票期權係其中一個好選擇，筆者認為最近兩地的房地產股，都非常適合使用期權。先講內房股，現時市場的看法分歧頗大，一邊廂話估值便宜，實在抵買，另一邊廂就相信打壓措施會持續，應該好難升，但一路講打壓，內房股表現又唔差，而且還有不足兩個月就到農曆新年，中央應會對民生及食品價格更為關注，內房未必是重點，在兩方角力下，會唔會升好難講，不過士佳相信唔會大跌，在此情況下，最好就係沽空認沽期權。
至於本地地產股，在政府公佈穩定樓市措施後，一直未見大跌，近日二手成交有復蘇迹象，但一手樓的貨尾依然乏人問津，以此判斷，地產股暫欠動力大升，因此可以沽空認購期權。由於估計餘下半個月大市不會太波動，如果不過份進取，如做平價或近價期權，以上行動在12月內應有賺頭。當然，粉飾櫥窗效應不能忽略，所以行動之時，手上應該有一定持股。
張士佳
寶來證券（香港）董事 投資服務部
mailto:[email protected]