舞龍舞獅平日都只係節日做綠葉助興，嚟緊2011年1月1日會擔正做主角。第一屆香港龍獅節打響頭炮，特登喺「4條1」元旦日安排1,111隻龍獅喺尖沙嘴廣東道，由2,222名運動員喺鑼鼓聲下舞動超過5分鐘，挑戰新加坡08年353隻舞獅嘅健力士世界紀錄。
參加者最細個得4歲，最年長有成80歲。活動召集人譚定邦話，小朋友同老人家用嘅獅頭輕啲，分別重5磅同8磅左右，比成人嘅獅頭15至18磅輕。
距離元旦剩得半個月，呢次破世界紀錄壯舉隨時搞唔成。事關活動除咗仲申請緊100萬盛事基金資助未批之外，就連申請當日下晝封閉廣東道、海防道同北京道，運輸署同警方仲未批出申請。