審計報告指直資學校行政混亂、財務違規冇王管，負責監管嘅教育局局長被狠批卸責兼混賬，每次立法會召開聆訊，包括噚日朝早，孫公例必俾議員噴到一面屁。不過孫公一向道行高，繼續心情靚靚咁出席下晝嘅恒隆數學獎頒獎禮，仲笑容滿面咁話自己讀幼稚園嘅時候已經對數學感興趣，同齡嘅小朋友仲用手指學緊由1數到10嘅時候，細路孫公已經識得噏「100」、「1,000」呢兩個數字同埋簡單加減算術。
丘成桐不滿香港教育
喺立法會狂轟下回應東拉西扯，仲直認「冇牙力」嘅孫公，一離開議會即刻生猛精靈晒。嗰頭話自己冇實直資學校盤數，係因為「睇漏眼」，孫公計數有幾叻，大家有辦睇，但佢一上台做主禮嘉賓，自信即時返晒嚟。
孫公講到細個時數學已經超越常人，仲話後來冇向住數學家嘅方向走，亦冇解釋點解選擇做官，只係話放棄咗數學夢，諗落有啲可惜。回顧幾十年喺政府工作嘅經驗，佢話數學知識雖然唔係經常用得上，但數學嘅重要性在於訓練學生嘅邏輯同解難能力，鼓勵在場學生要學好數學。
同場嘉賓、1982年費爾茲獎得主丘成桐早前狠批香港唔重視精英教育，只着重平均主義，將精英學生嘅水平拉低。呢位世界級數學家同恒隆地產董事長陳啟宗老友鬼鬼，04年一齊創立恒隆數學獎，希望為香港培育頂尖數學家。丘成桐上頒獎台時繼續批評，話香港喺五、六十年代培育出唔少傑出數學家，但近20年產量明顯少咗。佢鼓勵落敗嘅學生唔好氣餒，因為佢中學參加數學比賽時都輸過，「輸咗對我完全冇影響」。
孫公同丘成桐冇交流
好有意見嘅丘成桐，同孫公全程幾乎零交流。佢事後被問點解唔捉實孫公畀意見，佢就笑笑口：「孫局長都好清楚呢啲問題啩。」八方心諗，以孫公嘅作風，隨便一句慣用答覆，好似「現階段我唔評論，但係我哋會返去諗諗」，應該可以打圓場。
mailto:[email protected]