住家菜有幾好？唔使講都知道。但要港女放工後身水身汗去買餸煮飯？Noway！出街食得多，總會掛念媽媽的撚手菜、老火湯。針對酷愛煮飯仔、又放不低「即食」習慣的懶人，網上訂餸服務應運而生。讓你一次過擺脫味精外賣、叮叮飯盒、以至賓賓的手勢。
記者：蔡慧敏
攝影：陳盛臣
Model：Debbie@puremodels
鳴謝：FRESHTOGO、煤氣烹飪中心
個體戶vs社會企業
餸菜宅配在台灣和日本由來已久，材料已調味，免洗免切，按指示落鑊蒸炒十數分鐘便大功告成，省卻dirtyjobs之餘又唔會失手，似在酒店上cookingclass！至於跟超市餸菜包的分別，除了選擇更多、更刁鑽外，是宅配的餸菜都是下午準備、傍晚送貨，夠新鮮。是日測試的有個體戶FRESHTOGO、以及由東華三院和煤氣烹飪中心合作的CookEasy。前者剛在10月才開張，以講究的食材例如和牛、黑毛豬、有機菜作招徠。後者是08年成立的社會企業，為傷殘人士提供就業機會。至於第三間嘛……sorry，仲未出現！
富貴人家愛幫襯
張愛玲話，「通向男人心的道路經過胃」，住家菜無疑可以提升回家的意欲。各式餸菜包都順利通過「方便測試」，基本上若不是會把廚房燒掉的地獄廚神，都能應付自如。5分鐘炒一個靚餸，比淥杯麪還要化算，味道和誠意亦非叮叮飯盒可比。但FRESHTOGO（FTG）的創辦人RainbowYeung說客人主要是有外傭的富貴家庭，「不用再勞氣教賓賓們買甚麼，依着食譜去做就可以了。」三餸一湯套餐埋單要$250-$500，比到尋常酒家還要貴。「但吃慣的都知這是valueformoney的。」FTG有不少食材是不設零售的酒店貨，由Rainbow自己到供應商逐家拍門，打獵一樣。有機菜則是向本地單一菜場取貨，有任何事故都容易追溯源頭。對嘴刁一族而言，不用去完灣仔菜菜子又撲入大埔買健味豬，方便了不少。但學Debbie話齋，「可以讓不諳廚藝的港女扮大廚」就是最大的功德！久久不下廚的，也不用怕油鹽醬醋等到過期都未用完。
大比拼
價錢
FRESHTOGO
菜式由$60到$300不等。牛頭角順嫂會嫌貴，適合習慣幫襯city'super的闊太。
CookEasy
菜式由$30-$60，三餸「蒸」選套餐只需$92，夠4人享用，扺過自己買餸。最強的是有多款老火湯包和火鍋套餐。
包裝
FRESHTOGO
用MAP技術密封，抽走氧氣並注入氮氣填充，防止氧化。精美手抽內有冰袋保鮮。
CookEasy
用生物可降解的紙盒包裝，部份食材及醬料獨立包好，簡單企理。
送貨
FRESHTOGO
早上10點截單，黃昏送貨。最低消費$300，港島和九龍區免費送貨，新界區要付$50。周日及公眾假期休息。
CookEasy
早上10點截單，12nn-6pm送貨。不設最低消費。港、九、新界的運費分別為$30/45/50。港島買滿$250、九龍新界買滿$400可豁免。周日及公眾假期休息。
味道大測試
除了味道和賣相，易煮度也是餸包成敗的重要指標。要沒有太多煮食經驗的港女也能應付自如，為之勁！這些都要在菜式設計和處理食材時多花心思。Debbie偶爾也會在家自煮，但餸菜包的好處是「可以在男友面前扮廚藝精湛」。「但今次似係考我多過測試啲食物喎！」兩者相輔相成啦。
testI：日本蘋果滑雞球
採用澳洲無荷爾蒙雞肉，「食材靚便不用醃」老闆Rainbow滿有自信。蘋果用鹽水浸過，沒有氧化。蒜茸和芡汁都已準備好。難得的是腰果香脆而乾爽，一點油迹都沒有！
評語：「跟着附送的食譜炒埋一碟，全程不過5分鐘，好方便！像真度也高，似足酒家的小菜。」
testII：牛肝菌苦瓜炒蛋
牛肝菌夠矜貴，苦瓜是來自本地菜場的有機貨，甘而不苦，纖維幼細冇渣。最過份是連雞蛋都已打好、調味，非常懶惰！
評語：「炒蛋講求手快，好易過火或撻成一塊，有少少難度！價錢貴，平日煮一碟苦瓜炒蛋10蚊有找，這個是貴在日本蛋和幾片牛肝菌吧。」
testIII：銀魚蒸勝瓜
家常的味道，份量足夠3-4人用。銀魚已浸好，放在碟上蒸10分鐘即成。
評語：「盒上的簡介說蒸熟後淋上豉油，但銀魚和蒜茸已相當夠味，宜自行調節。」
FRESHTOGO（28666881）
網址： http://www.freshtogo.hk
CookEasy（28709214）
網址： http://cookeasy.tungwahcsd.org
其他選擇
講究食材但無時間買餸的，可幫襯Oisix日本食材宅配。蔬果及雞蛋來自有機農場。
查詢： http://hk.oisix.com
懶無可懶又要食住家菜的，幫襯「住家菜」好了。跟叫外賣無分別，勝在清淡少油水。
查詢： http://www.home-feel.com