贏波都發火，睇怕全球冇乜幾個教練好似摩連奴咁緊張嘞；周日皇家馬德里作客薩拉戈薩，輕鬆贏3:1，不過下半場前鋒賓施馬單刀失機，嬲到摩帥成個彈起，結果個頭撞埋後備席頂，要勞煩軍醫睇吓「寸王」有冇「爆缸」（圖）。摩帥已經開到口下月要買新前鋒，若果賓施馬繼續唔生性，睇怕都好難留隊。緊張嘅唔止摩連奴，基斯坦奴朗拿度都係，事關雖然佢喺呢場波都入咗一粒，累積18個西甲入球；不過同日巴塞隆拿5:0大炒皇家蘇斯達，上番榜首之餘，美斯更入兩粒，西甲神射手榜追到只爭C朗一球，兩個人睇怕仲有排鬥。