喺職業足球壇，好多領隊對一個「賭」字敬而遠之，最怕麾下球員沾上賭風；不過言行一向出位嘅英超黑池領隊荷路威（圖）就啱啱相反，喺黑池於上周六嘅聯賽作客擊敗史篤城之後，佢就話致勝秘訣係帶全隊去咗賭場備戰。荷路威話：「呢排由於天氣唔好，我哋除咗去沙灘練習之外，仲拉隊上咗賭場，因為我哋想睇吓邊個奪得啤王大賽，而有啲唔識玩啤牌嘅球員，仲即時上咗幾堂㖭！但呢招其實唔係人人都受，我哋嘅龍門（佢專登冇指明係邊個）就悶到瞓着咗。」