佐雄証券主席李佐雄，唔係一個高調嘅人，不過佢縱橫股壇近35年，所以喺金魚缸無人不識。佢近年已經好少喺公開場合講嘢，尤其係唔多講股市，「有啲嘢，你講一次半次，之後好難證實你自己講嘅嘢啱唔啱，如果要好似啲名嘴咁，第一，我覺得好辛苦；第二，每日講嘢我覺得好高難度o架！」
炒國策股 要先分真假
咁即係從來唔畀貼士、唔畀意見？雄哥話：「唔係，只係有啲嘢你冇同一個客戶交流接觸而畀意見，我自己係比較有保留喇！除非你同個客傾過，真真正正明白佢嘅諗法。」
所以，喺個半鐘嘅訪問裏面，唔係佐雄証券客戶嘅華華，並無獲得雄哥提供更深入嘅意見或者任何股票冧巴。
至於股市大方向，佢好樂意講兩句，尤其係當炒嘅所謂「國策股」，「大陸新聞日日有，但係真假你要諗清楚，大陸做投資係有個好處，呢幾年好多嘢支持佢嘅經濟向上，不過內地有個唔好處，就係佢可以喺政策上令某一啲公司、行業受惠，又或者係特別受到打壓嘅……好似家要出口轉內銷，你要留意係包括啲咩行業，要自己搵囉。」
佢又話：「整體嚟講，好多嘢係支持緊佢（中國）經濟向上，但你話好多消息係真定假，又或者係人為令到某啲股嘅股價好波動，咁大家就要留意嘞！」港股直通車可以炒車、GDP都可以有水份，更何況係國策。
名嘴講嘢 散戶要聽足
「聽啲名嘴講嘢，你最緊要係明白佢哋獨特嘅見解，唔好純粹單方面聽買定賣，做一個決策，唔好貿貿然話聽到買或者賣就去做，大家都要負番啲責任，你要聽番佢講嘅原因，咁你先保障到自己，就算決策錯咗，都唔會錯得咁離譜。」至於對恒生指數嘅預測，「最緊要聽佢睇幾多點嘅理由！」冇錯，就算死（輸），都要知點解！
講到佢自己證券行嘅生意，佢話家好多人鍾意網上買股，但亦有好多人上證券行打躉吹水，「純做盤以平為主，咪網上落盤囉，如果希望有人傾吓偈交流吓心得，俾啲專業意見，就會上證券行，呢個就係我哋嘅價值……」
1987年開業到依家裝修一啲都無變過嘅佐雄証券，賣嘅應該仲有一份情懷。
李華華
mailto:[email protected]
