女友2號　的骰好揸啲

講一句「我玩完你喇」！飛甩舊愛、通常就釀成悲劇；做第三者壓力幾大就唔知，但呢位女友2號，莫講話男人鍾情，甚至女人都想嗒！皆因佢係GF2，今次二代目不但保留Micro4/3優良傳統，外觀及重量更大縮水，加上全新任篤、任捽靚芒大玩花臣，你話係咪要換畫先？

記者：陳國輝
攝影：陳陶鈞

機身縮水近兩成

齋講單反設計，GF1早就成為專業拍友至愛！除咗體積細，最重要係保留番手柄位，等你可以雙手托實部DC，咁影相先唔怕手震。嚟到GF2，呢個Design仍然保留，最大分別係機身長、闊、厚都縮水差唔多兩成，重量亦輕咗百分之七，裝埋電池亦不過310g；但相對分唇掣亦少咗，例如機頂無得直接轉Mode，而背脊亦得番最基本嘅十字按鍵，全程改晒由屏幕操作，可能要用啲時間適應喇！

■設計分別唔大，重點係細咗輕啲。

■新舊Micro4/3鏡全部用得番！

■套裝分三種：包括14mm定焦、14-42mm變焦，又或者兩者兼備。

篤芒直拍　反應快

可能你又問，既然要人變心，淨係細粒咗又點夠？GF2另一焦點，就係佢個3"輕觸式屏幕，嚟到第二代，大部份功能都要靠篤芒操作，特別一提機頂嗰粒「iA智能拍」按鍵，一㩒之下，超簡易操作模式立即喺屏幕出現，例如想影近或遠景，只要將鏡頭面向對象，佢就會自行選擇用微距或風景模式，然後你只需篤一下被攝對象，唔使一秒就拍低，按快門動作都慳番！
但有專業拍友覺得，如果全程靠篤芒操作，會好易令機身造成震動，影響照片質素；再者，功能如此簡化，對玩開全手動嗰班發燒友而言，仲點會有滿足感先！