在滙豐MPF舉辦十周年酒會之夜，Sevva露台外，擠滿人群，有行不得也哥哥之嘆，突然俾人叫住，原來係滙豐銀行工商業貸款部一位主管賓架Ｎ，碰杯飲過香檳之後，賓架Ｎ講起最近與太太返回母校中大新亞書院與校友重逢，有百幾人參加，令人喜出望外，當晚有籌款活動，一幅供拍賣籌款之用嘅書法作品，上書「手空空無一物」之校歌歌詞，佢就一路舉手，以萬幾元買入，與太太感到十分高興。好吖，讀書時，同學絕大部份係窮學生，真係手空空，無一物，畢業多年後，賓架Ｎ已係銀行高層，佢太太嘅同窗出任藍籌工業股CEO，還有其他等等，總括嚟講，不再手空空，而是有產有餘，回饋母校，此其時也。
後來校友Ｄ來電通知，十二月十九日係中大校友日舉行，一個月前已有千幾二千人報名，十二月十三日係報名截止日期，上中大校友網就得（www.alumni.cuhk.edu.hk）。當日有乜節目呀？校長沈祖堯在十二月十六日上午行就職禮，正式上任，到時當然會在現場招呼校友，並且粉墨登場講書：「面對二十一世紀的洪流」，除校長之外，講書嘅教授還有內科及藥物治療學講座教授兼心臟科主管余卓文講：「輕輕鬆鬆講心事」，大學通識部趙茱莉與王永雄兩位博士講：「與人文對話」、「與自然對話」，帶埋一家大細返中大嘅校友就可以參加小童攤位益智遊戲、反斗泰山、激輪滑梯及水泡相撲，想行校園嘅有校園樹木講座及導賞；中大校友會聯會就請教育界校友廖亞全（津中議會主席）、林建華（直資學校議會主席）及區月晶校長（中大校友會聯會會長）講解「小六升中一面面觀」。鍾意參觀嘅，可到文物館欣賞利氏北山堂捐贈中國文物以及抱一齋中國古代漆器、香港七千年歷史，和中藥園自「悠」行。
有咁多節目，直情係老中青幼咸宜，十二月十九日中午十二時於百萬大道開始直至下午五時，晚上各書院及研究院院長邀請書院校友參觀書院近貌，並可報名參加書院及研究院晚宴，校友Ｄ話節目多籮籮，一個人冇法子參加得晒，但正因為夠多元化先至可以讓所有參加校友日嘅校友能各取所需。