韓片《我的野蠻女友》有幕講男主角殺入大學講堂送花畀女友，相當浪漫，估唔到係香港嘅IVE最近都出現類似場面，男同學拎住紮花走入lecturetheatre向女同學示愛，令到課堂一度中斷咗5分幾鐘，不過到最後都好似冇結果。
段片（www.youtube.com/watch?v=khpnNT44Z60&feature=player_embedded）喺網上熱播。片中一位男同學攞住束花，公開話想送畀一位長髮女同學。女同學好怕羞，係咁用筆記掩臉。
首輪攻勢失敗，男生問Miss借咪，當眾話「我好鍾意你呀，受唔受媾呀？」其他同學幫口大叫「受佢，受佢」。女同學一直笑，但冇任何回覆。
求愛求足5分鐘仍冇結果，老師繼續上堂，男仔就尷尬坐低。段片上網後，有網民鬧班學生無心向學，亦有人讚個男同學勇氣可嘉。