煲呔噚日帶埋老婆入咗沙田馬場，主持香港國際賽事開幕，兼且擔任重頭戲香港盃嘅頒獎嘉賓。平時對賭錢冇乜興趣嘅佢，以往特首盃呢啲場合入場但唔落注。噚日就突然興起，話好想買馬，拎咗100蚊出嚟，一注獨贏買第三場九號「怡勝」，隻馬係全場最冷，有成105倍，賠率非常吸引。
心水大冷馬影都冇埋
可能煲呔身邊啲人見佢少有重槌敲隻大冷馬，以為佢有內幕貼士、無寶不落，喺驚死執輸嘅心態下，大家都跟風買番少少。
煲呔都算有先見之明，嗰場馬結果真係爆冷，可惜，贏出嘅冷門並非佢落注隻「怡勝」，馬場永遠冇咁大隻蛤乸隨街跳，煲呔隻心水跑到三甲不入、影都冇埋，投注嗰100蚊自然進貢咗畀馬會鋪草皮，跟煲呔風落注嘅，馬會真係多謝都冇句，一律通殺。
八方覺得煲呔都算有良心，揀隻大冷門落注，假若佢下注隻大熱門，萬一又搭沉船，廣大馬迷真係多得佢唔少。加上市民經常狠批「官商勾結」，如果今次煲呔真係贏隻冷馬，嗰時「官馬勾結」嫌疑真係水洗唔清。
貼馬唔掂，但搵美食對煲呔就完全冇難度。佢前日去工展會掃貨之前，同埋成班特首辦要員拉隊去獲米芝蓮一星級評分嘅深水埗「添好運」嘆早茶。添好運出名嘅除咗點心好食，仲有無論幾時都要排長龍嘅盛況。八方聽聞慕名而至嘅煲呔當日專程晨早8點出動搵食，都係為咗避開人潮，亦唔會滋擾到市民，結果輕易就搵到位。據聞店舖經理見到煲呔到場都有啲surprise，驚魂甫定就上前打招呼同派卡片。
大讚添好運好抵食
煲呔同曾太結果嗌到成枱點心，當中要數酥皮叉燒包同腸粉最得煲呔歡心，傳統蝦餃燒賣亦都獲得好評。埋單計埋百幾二百蚊，即係每人十幾廿蚊就可以食到肚皮脹爆，難怪煲呔大讚「大件夾好食」，但原來佢平時至愛嘅係腸粉同蒸排骨。可惜煲呔今次去到深水埗，竟然冇到訪近期熱爆嘅西九名將壽司，如果佢敢上陣挑機試食，民望急升都未定噃。
mailto:[email protected]
