崔建邦的舊愛「中巴」鄺敏慧及其俄籍模特兒緋聞女友MarinaV.昨日同場行騷，今天生日的中巴大晒與年長11年的新男友拍拖生活愉快，不用收收埋埋兼不怕男方郁手郁腳，現在恍如置身天堂般高興。
崔建邦前女友鄺敏慧昨日與其俄籍新緋聞女友MarinaV.齊齊現身尖沙嘴i-Square，與諸葛梓岐、張舒雅、周永恒太太趙梓淇（阿Yu）和Juno女友Janine等同台行騷，示範以珍寶珠糖果為主題的時裝。
「唔記得舊嗰個」
記者騷後邀請中巴及Marina合照，中巴才知Marina是崔建邦的新女友，她說：「唔知，好surprise，同佢冇聯絡。」問到她會否感到甩難，她笑說：「太好，自己有新男友，唔記得舊嗰個，呢個好好，我自己行騷都識得笑。」
中巴透露今天是她21歲生日，將會與拍拖兩個月、比她年長11年的圈外男友二人世界慶祝，記者問到男方是否溫柔，不會對她郁手郁腳，她說：「冇錯，唔會郁手郁腳，前日已預祝我生日，送咗99支玫瑰，又巴士蛋糕，同上年好大對比，好似上咗天堂。」
「各方面都好好」
中巴續說：「佢各方面都好好，唔會郁手郁腳，又肯公開，唔使收收埋埋，男友都支持我做呢行。」至於Marina則風騷地谷胸，大擺性感甫士搶鏡。
採訪、攝影：JessicaNgan
