港澳辦前主任廖暉退休冇耐，又有新動向，今次佢衝出省港澳，殺入大洋洲，擔任「中國──大洋洲友好協會」第二屆會長。大洋洲地區包括澳洲、新西蘭、南太平洋地區島國等等，唔講唔知，呢度原來20幾個國家，要去勻晒做親善訪問，都要用好耐時間。
而呢個友好協會掛名係民間組織，但喺大陸一般同類組織同政府部門都冇乜分別。個會嘅宗旨包括擴大民間交流合作，維護世界和平等等。維護世界和平喎，咁偉大嘅工作，廖暉真係要加油呀，如果做得好，分分鐘有機會角逐孔子和平獎，到時就可以現兜兜攞到10萬蚊人仔獎金，仲可以同連戰平起平坐。