賭王何鴻燊早排獲頒大紫荊勳章，噚晚佢喺中環文華東方酒店搞慶祝酒會，廣邀城中好友、富豪同前政府高官出席，包括前特首董建華、趙世曾、前民政事務局常任秘書長李麗娟等。至於李嘉誠紅顏知己周凱旋、富豪鄭裕彤、胡應湘、胡文新及細劉劉鑾鴻，亦咁啱喺文華出現，認真熱鬧。
趙世曾送花
賭王噚晚七點幾坐車離開淺水灣寓所去文華，沿途有乘坐寶馬房車嘅二房長女何超瓊同一部保鑣車護駕，賭王見到記者即揮手微笑。
趙世曾七點半到酒店，但逗留咗十分鐘就走，佢話：「我係約咗賭王，今晚係慶祝佢攞大紫荊勳章，但只係一個cocktail。賭王有上台演講，我送咗花畀佢。」
周凱旋避忌
彤叔亦喺約七點半同胡應湘、胡文新父子離開酒店，問彤叔係咪同賭王慶祝？佢話：「唔係，我哋自己食飯啫。」
周凱旋喺兩名外籍保鑣陪同下到場，佢見到記者都好避忌，問係咪去賀賭王？佢就耍手擰頭話唔係。