延長交易時段將會喺出年3月付諸實行，但新嘅食晏時段，大家仲好有意見，「內地A股11:30至1:00休市，如果香港1:00休市就剛剛接住A股開市，就算有咩消息，投資者都可以喺是但一個市場做到嘢，如果係12:30至2:00，中間有半個鐘做唔到嘢，投資者就會被迫去咗新加坡……」李佐雄擔心嘅係漁人得利。
「你話向前看可以增加競爭力，縮短啲（午休時間）我哋唔係話好抗拒，但大家希望可以講番大家嘅諗法，話分兩個階段實行，係咪競爭力加咗好多呢？希望到時可以檢討吓有咩得益，喺市場運作目的都係做多啲生意爭取多啲客，唔好話因為呢個交易時段改動，而有機會俾人哋有機可乘搶走我哋啲生意……大家覺得可能會助長咗新加坡」。
「咁多年交易時間冇變過，唔只金融從業員，成個市場都習慣咗，係會影響好多人嘅習慣同公司運作，總之大家希望有一個適應期或者再諗清楚啲，1:00係比較接近今日社會嘅生活模式，影響應該會少啲。」
分歧係有，但相對李佐雄1986入行嗰陣，監管機構同業界之間，關係已進步唔少。「行新嘅證券條例之後，出事機會細咗。呢幾年，同市場嘅溝通交流做得好咗，好似冇以前對立嘅心態，溝通互動多咗，佢哋推好多嘢，但會微調，咁溝通同諮詢緊密咗，將來條例有咩改變，你都可以做好啲，令日後負面影響降低……」咁即係希望交易所合作，將延長交易時間微調囉？