日日住銀行存款息率嘅慳妹，上個禮拜好雀躍咁走過嚟同敏妮講，有一、兩間銀行嘅定期存款利息加咗，而且加得都幾顯著。其實好友Derek張一鳴早已提醒敏妮，香港銀行水緊，而最便宜嘅渠道就係擸多啲存款，所以加存款息一啲都唔奇。
利息勝定存 惟年期較長
其實唔使等專家講，敏妮都知，喺啱啱加息初期，做定存宜短不宜長，費事lock住啲資金，當再加息時，miss咗攞更高息嘅機會。除咗做定存，「波Sir」李兆波成日同敏妮講，做定存不如吼吓銀行出存款證。同銀行定存穩陣程度有得揮，但利息就高啲。
不過，銀行唔係成日都有存款證推出，敏妮認識幾位auntie，由於退休冇世藝，成日都會去同銀行職員打吓牙骱過日辰。
佢哋除咗會問吓外幣定存邊隻貨幣好做，亦識得問吓幾時有存款證推。當然職員知道銀行推存款證，都會提醒auntie。
不過，存款證嘅年期較長，起碼都要綁一年，雖然話期間如果真係有資金需要，可以未到期就喺二手市場將存款證賣出，但係，正所謂財不入急門，存款證一般成交唔係咁活躍，所以越心急想沽，價錢就越唔理想。投資存款證，最好都只係作為投資組合一部份。
題外話，整理敏妮blog嘅時候，見到一位樹仁大學新聞系嘅朋友，想搵敏妮做訪問，分享職業blogger嘅見解。先多謝呢位朋友咁睇得起，但真係唔好意思，因為敏妮並唔係乜嘢職業blogger，寫欄都係「掹車邊」，當然唔可以當職業，所以應該幫唔上忙。
當然如果有其他問題想提出，歡迎你哋透過敏妮blog講畀敏妮知，本人一定盡力回覆。話說回頭，敏妮都想知道靠寫blog係咪真係賺到錢兼當職業，有冇人可以分享吓呢？
溫敏妮
http://wanmanli.com/blogs/