財爺曾俊華連續第二年粉墨登場，拍宣傳片呼籲市民提啲絕世好橋，畀佢炮製新一份財政預算案。舊年財爺鬍鬚曾分別以劍手、茶餐廳阿叔同匿埋柱後嘅路人甲造型現身宣傳片，表情木獨，短片亦俾人惡搞。今年佢只拍一個版本，仲係做返自己，坐喺財爺辦公室梳化齋噏，不過佢不忘喺短片搞爛gag作風。
輕鬆之餘唔可以輕佻
鬍鬚曾唔係首次拍嘢，但佢話今次依然好緊張，因為既要喺鏡頭前記熟對白，又要保持笑容，態度輕鬆之餘又唔可以過份輕佻，對於佢呢個演戲門外漢嚟講實在係一大挑戰。自嘲唔係「視帝」材料嘅鬍鬚曾聲言缺乏演藝細胞，一而再、再而三登場無非要引起市民關注，今年亦會再度推出預算案諮詢漫畫，專攻年輕人市場。
咪睇少呢幾十秒短片，事關足足花咗兩個月籌備，首先係招標搵製作公司同制訂工作時間表，然後又要同製作公司開N次會商討拍攝工作，鬍鬚曾揚言由創作落實再到選角、服飾道具等安排，成個過程一絲不苟，總之賣花讚花香。