一年一度國泰航空國際賽今日在沙田馬場舉行，本想搵國際賽事專家馬主N問吓貼士，點知佢今年有要事在身，竟然不到沙田馬場，去咗廣州，佢話歷史上第一次不參加國際賽，不無遺憾，但適逢廣州2010亞殘運會亦舉行開幕禮，所有代表要早一日到達廣州報到，馬主N最近兩年為香港傷健運動做義工，跟埋代表團上咗廣州，冇得睇國際一級賽咯。
於是唯有靠自己，溫習馬會派嚟嘅「2010馬匹往績特刊」，希望研究到一兩匹冠軍馬。第四場跑二千四百米香港瓶，1號「美利堅」係法國馬，贏完澳洲墨爾本盃之後來港參賽，配上大賽騎師巫斯義，肯定係熱門，配腳有去年香港瓶第四名，今年日本盃亦跑第四嘅日本馬3號「網絡電郵」，5號「技藝精湛」來自阿聯酋高多芬賽馬集團意大利打吡冠軍，配上一級高手戴圖理，必定唔會嚟遊馬河嘅；香港馬較為水皮，唯有望過氣馬王2號「爆冷」及8號「好先生」可以打入位置。
第五場香港短途錦標跑千二米好刺激，1號「蓮華生輝」惡鬥3號新加坡短途馬主「火箭人」，大家千祈咪走雞，呢場香港明星馬盡出，有4號「綠色駿威」，7號「極奇妙」，8號「同一世界」，9號「小橋流水」，10號「天久」，照睇全部只可以爭第三名啫，一於為「蓮華生輝」打氣！
第七場香港一哩錦標跑千六米，香港馬2號「步步穩」雖然今季表現好，但已經8歲，體力足可以支持？9號「自由好」今季大熟大勇，應該係本地希望，只嫌騎師都爾唔係國際級，另外1號「小柏高」戰績優秀，配上莫雅，如虎添翼，日本馬6號「榮進快蹄」亦合路程，有啲威脅，呢場買1，9，2，6。三屆冠軍7號「好爸爸」又點呢，好似老咗冇銳氣，只得放棄。
第八場係全日主題曲，獎金最高嘅香港盃跑二千米，係本地捧盃王大摩嘅目標，2號「閒話一句」與6號「魔法幻影」各為其主，不分主力，1號法國馬「萬千景象」係上屆盟主，配柏兆雷排第7檔，合晒合尺，極有勝望，另一匹法國馬3號「天鷹翱翔」亦非嘢小，初步睇落就揀1拖2，3，6，臨時睇吓狀態再算。