首長四方（730）主打數碼影院解決方案，呢個發展方興未艾，首長四方有排玩，好。首長四方2010年半年度（6月底止）純利急升咗11倍到1180萬銀，集團09年同期純利基數低，所以純利增長好似好誇張。但要咁睇，呢期全世界就發展數碼影院熱潮方興未艾，連埋祖國電影市場龐大嘅發展潛力，首長四方食住呢條水，長賺長有。真係係咁易計數，首長四方2010年全年度純利，好保守咁增長30%到5000萬銀，預期PE得11倍。
再講，首長四方現價挨近1年低位，以集團所揸住嘅環球數碼（8271）應佔權益市值過5.5億銀，仲大過集團本身市值，首長四方股價好低殘。呢期趁低撈底，以首長四方預期PE15倍做目標，集團要見0.66元，現價都講緊要升30%過外，目標PE仲係相當抵買。
漢傳媒嚟轉短打
漢傳媒（491）近半年喺兩毫子上落，現價係03年沙士期以嚟嘅低位水平。即係話，集團現水位好少蟹貨。漢傳媒最新NAV每股0.285元，現價仲有27%過外折讓。又就算扣埋可兌換票據債務1.85億銀，集團淨現金仲高達1.15億銀，漢傳媒係現金牛。而呢期集團有意發展再生能源業，有消息入市，順勢嚟轉短打，博漢傳媒上番0.285元，現價升幅38%。
錢雋