聖誕睇碟，少不免揀啲應節嘢，開心熱鬧就至啱！今個星期史力加終極大結局《史力加萬歲萬萬歲》終於落場；睇住史力加同成班嘩鬼老友，玩轉山卡啦王國，聽住森美、林海峰同杜汶澤搞笑生動嘅配音，最啱一家人熱鬧過聖誕！
記者：許福合
三年之癢
好多人話七年之癢，但史力加三年就身癢！做咗幾年好爸爸，又想搞事，竟然同侏儒怪簽下魔鬼協議，反轉山卡啦王國！當史力加跌入另一個世界後，發現朋友們都面目全非，拉車隻驢仔竟然係死黨驢友，老婆變成叛軍首領，仲被佢拳打腳踢，要改變現狀，史力加要喺24小時內搵到真愛之吻，否則佢可能會永遠消失！
森美配音 地道生鬼
睇西片一向都愛聽原聲對白，咁先覺得原汁原味，不過今次《史》呢隻Blu-ray，就自動自覺將配音選擇為粵語，事關會由三大笑匠負責配音，杜汶澤繼續聲演史力加，而林海峰就配驢友，因為戲中有唔少地方要唱歌，啱晒阿Jan，可以表演歌喉！
不過講到最生鬼，我就首選森美配音嘅侏儒怪一世，作為今集嘅大奸角，自然好重戲份，森美演繹得維肖維妙嘅同時，仲加咗好多生動口頭禪，香港觀眾睇落更親切！
首批影碟 送萬年曆
《史》始終都係CG動畫，色Sharp畫靚就梗，如果電視機夠靚仲會出到好靚質感，大家要留意。此外，首批Blu-ray同DVD都會送限量版「史力加活頁萬年曆」！打算買DVD版要留意，除咗標準單碟裝外，仲有雙碟版同珍藏套裝，會多咗驢友聖誕特集DVD及聖誕動畫短片、聖誕歌、小遊戲、聖誕裝飾等，而珍藏套裝更包括1-4集《史力加》，Fan收藏必選！
《史力加萬歲萬萬歲》
Blu-ray$268
DVD$148
雙碟版DVD$198
珍藏套裝DVD$398
