好耐冇返香港嘅Angelababy（楊穎），噚日喺尖沙嘴b+ab出席自己肖像嘅慈善Boxset活動，仲同一班小朋友合照，幫聯合國兒童基金籌款。
感覺幸福
着住LanvinforH&M短裙嘅Baby話：「一直想有個自己嘅卡通人物，今日好似睇住個女出世，又做善事，覺得好有意思。」
Baby話聖誕要喺工作中度過，咁黃曉明咪要孤獨過節？Baby怕醜笑住話：「我唔知呀！」再問Baby買咗禮物畀海綿蛋糕（指黃曉明）未？佢就東拉西扯，一時話買咗按摩椅畀媽咪，一時就話買禮物同同事交換。
講到早排搞制服派對同黃曉明賀壽，Baby尷尬話：「我同好多朋友都慶祝生日。」家興公開戀情，好似阿Sa（蔡卓妍）同陳偉霆咁，Baby就話：「佢哋好幸福，我一直覺得自己都好幸福。」問佢係咪怕公開咗會影響戀情？Baby話冇諗咁多，總之專心工作，順其自然。
同樣後生
有傳黃曉明同Baby會喺新片合作，Baby話唔講得住，但問到覺得自己同海綿蛋糕外形襯唔襯？Baby就細細聲話：「我睇起嚟都幾後生，佢睇起嚟又幾後生囉。」哦，即係襯啦！