立法會噚日開特別內務委員會，講人口政策同生育問題，但最後竟然變成疑似特首候選人同議員之間唇槍舌劍。用政務司司長身份發言嘅唐英年，回應議員提問時搞爛gag，反指議員好唔合作，冇響應政府呼籲生多幾個，又話街工梁耀忠一個都冇，認真唔聽話。
葉劉寸只係識廢噏
議員爭相回應。公民黨梁家傑話已經達標，又話唐唐平時對議員態度麻麻，估唔到連議員啲仔女一樣唔尊重。梁耀忠聽完之後就更加嬲，因佢已經有一個已經成年嘅囝囝，反鬧唐唐做研究做得好差。
被指同唐唐跑馬仔最大對手嘅梁振英（CY），亦透過代表喺會議廳發功。盛傳係CY盟友嘅葉劉淑儀亦趁機發炮，佢話02年由商界轉做問責高官嘅唐唐，咁耐都只係識廢噏，表達能力原地踏步，平時見記者亦只係識照稿讀，擺明質疑佢做特首嘅能力。