黃德斌與女友黃美恩（Joyce）拍拖10多年經常有影皆雙，前日記者又發現二人拍住拖到銅鑼灣睇醫生。由於近日無綫小生花旦頻頻傳出喜訊，記者遂開玩笑問黃德斌是否女友有喜，但他沒好氣地笑道：「我去洗牙咋！我都戥佢哋開心，咁忙都搞到，真係佩服！」
憑《火舞黃沙》宋東陽一角於06年奪得無綫台慶頒獎禮最佳男配角的黃德斌，近日正忙於拍攝新劇《心戰》，不過前晚仍見他抽空與拍拖多年女友黃美恩（Joyce）到銅鑼灣逛街兼去睇醫生。
女友小鳥依人
前晚6時許，一身便服打扮的黃德斌與女友在銅鑼灣皇室堡附近出現，Joyce如小鳥依人般蹺實男友臂彎行街街，沿途有講有笑相當甜蜜。
之後黃德斌與女友走到附近便利店買了份《蘋果日報》，然後二人再往恒隆中心內的醫療中心，逗留了大概一小時後離開。
未有計劃結婚
記者昨日致電黃德斌，打趣問他女友是否有喜要睇醫生時，黃德斌沒好氣說：「我洗牙咋！」談到近日蔡少芬、黃浩然、郭晉安和曹永廉接二連三公佈快將為人父母的喜訊，黃德斌亦戥眾人開心，他說：「我都戥佢哋開心，咁忙都搞到，真係佩服！」
那麼黃德斌又會何時宣佈喜訊，與女友拉埋天窗結婚生仔？黃德斌說：「我暫時未有計劃，有嘅話到時話你知啦，我都好忙o架！」另外，黃德斌與陳豪等主演的新劇《天與地》將於明年推出，黃德斌寄望屆時的演出能令觀眾耳目一新。
採訪、攝影：羅德光
