大家樂早排因為剋扣飯鐘錢風波搞到神憎鬼厭，本來係自由黨黨友嘅田北辰同張宇人，一個踩場、一個撐場。大家樂集團主席陳裕光噚日話，今次事件後已經冇再同企喺員工一邊嘅田二少聯絡，仲諒解政客喺今次事件的確可以攞到市民支持喎。
對於幫拖嘅張宇人，陳裕光就梗係大讚肥仔張為飲食業界做嘢，絕對係代表到飲食界咁話啦，但今次扣飯鐘錢搞到外間有人發起罷食抗議，就算政黨幫口亦冇用，要撤回刻薄做法至解決問題。
陳裕光連續兩日向記者解畫，話從來冇諗過刻薄員工喎，被指係無良僱主仲覺得好委屈。咁講令人想起係咁話自己冇做錯嘅梁展文，市民聽你噏兩句就buy？咁易咩！