挪威噚日舉行諾貝爾和平獎頒發儀式，雖然獲獎嘅劉曉波仍然被囚禁，頒獎現場只得一張空凳，但係八方仍然好感動，因為可以親眼見證到中國人攞和平獎呢個歷史時刻。內地同胞就冇咁好彩，雖然好多人硬撐劉曉波，但中共全力封鎖，搞到無法子知道挪威嘅情況，不過你有張良計，我都有過牆梯，網友大打「翻牆戰」，用實際行動聲援劉曉波，亦幫自己維權，捍衞公民行使資訊自由嘅權利。
粵傳媒竟向員工施壓
崛起嘅大國近排連番出手，對外話全球好多國家唔出席諾貝爾頒獎儀式，再整個孔子和平獎出嚟獻醜硬撼。到噚日大日子，就出撒手鐧「閉關自守」，封鎖所有劉曉波同諾貝爾和平獎消息唔在講，全力監控互聯網，網絡長城全面升呢，各大小網站、微博同討論區都唔使旨意見到「劉曉波」、「和平獎」甚至「挪威三文魚」呢啲字眼。國際記者聯會中國及香港代表胡麗雲就同八方講，話廣東省直頭有傳媒機構向員工施壓，講明放工之後唔好諗住喺微博講劉曉波，否則肯定聞到魷魚香。
普通技術翻唔過牆，唔少內地網友決定玩大佢，畀錢買個VPN虛擬網絡account，經海外網絡迂迴上網，避開各級打手圍堵同河蟹大閘，登陸諾貝爾官方網頁，留下有血有淚嘅賀電留言，署名包括廣州街坊、湖南人民、中國傳媒大學、大連海事大學等等，有人仲用「hu錦濤」名義留言，話自己「鴨梨（壓力）很大」！
貼圖「買傢俱」展空凳
冇咁大財力嘅網友都冇放棄，你有你審查，我有我作文，喺內地討論區《天涯網》，八方就見到無端端有篇「劉翔真是中國之光啊」嘅文章被熱烈轉載，click去睇吓，橫睇只係激讚欄王嘅擦鞋文一篇，但打直睇就即刻有玄機，由每行頭一個字組成「劉曉波獲頒和平獎將於12月10日頒獎劉霞被軟禁中共下台」，呢篇暗撐劉曉波嘅「劉翔密碼」，八方無法子唔like。另外又有人開post貼圖話「今天買傢俱」，結果成個post都只有各款空凳。人民嘅意志同堅持，當權者用幾高壓都阻止唔到。
mailto:[email protected]