臨近年尾，又係各大學公佈上個財政年度成績表嘅時間，八方記得上個財政年正值金融海嘯，各大學幾乎都出現赤字，好似港大財政就錄得近15億虧蝕，不過經過一年強勢反彈已經轉虧為盈，截至今年6月底，已經錄得8.4億盈餘。一來一回相差23億，都咪話唔犀利。
港大份司庫報告話，今次大逆轉嘅關鍵之一，係大學上年籌款成績理想，由上一個財政年度籌到2.2億，增加四倍到成8.7億，相信係因為政府今年再推出第五輪配對補助金計劃，令到好多善長願意捐多啲畀大學做配對。另外，部份投資資產嘅價格，喺金融危機後回升，令紅字今年都變番做黑字。