「噴火華」黃日華主演的無綫台慶劇《刑警》昨晚播出大結局，不過卻未有如《義海豪情》受重視搞結局party，一眾演員惟有前晚自掏腰包搞飯局敍舊，為大結局造勢，希望臨尾創出好成績。另外黃日華日前明讚暗踩林峯，當晚他又借女兒過橋指無綫只識不停播林峯催谷人氣。
無綫台慶劇之一《刑警》昨晚播出兩小時大結局，不過一眾演員前晚率先相約到佐敦，一邊打邊爐一邊睇劇敍舊，黃日華、苗僑偉（三哥）、宣萱和胡定欣等一同出席，其中黃日華更帶同久違了的老婆梁潔華現身，而宣萱則和外籍男友拍拖而至，認真恩愛。
曾向高層查詢
問到黃日華是否他請客？他表示今餐是三哥作主，提到同是台慶劇的《巾幗梟雄之義海豪情》當日播大結局時，無綫在電視城搞party直播，但《刑》劇卻未有獲此厚待，只是昨晚連播兩小時大結局，黃日華說：「我都有問過梁家樹，佢解釋因為我哋係喺星期五播，所以唔搞，原本我哋都想大結局先食飯，但今晚係最齊人，所以食咗先。」會否接受公司的解釋？黃日華表示可以，因為公司也有自己的選擇。
揶揄林峯勢強
提到日前台慶頒獎禮，林峯得到我最喜愛的電視男角色獎，之後黃日華在微博留言祝福他是宇宙最強人氣，似是明讚暗踩，黃日華笑說：「我個個都讚喎！佢前半年真係儲埋好多人氣，我個女話又係林峯，又係林峯，話成日都見到佢喎。」至於有份提名視帝的黃日華當晚沒有出席，似用行動杯葛以示不滿，他透露：「我一向都唔理獎項，公司有叫我同三哥去頒獎，但我又覺身份尷尬，所以拒絕。」至於會否再為無綫拍劇，黃日華表示言之尚早。
問到宣萱會否覺公司偏心？她直言：「唔使答，讀者會睇到。」至於三哥對於沒有搞結局party一事說：「我冇了解，隨緣，冇話乜唔公平，各有各做，唔會唔開心。」另外，三哥昨日與「翻版徐子淇」鍾浠文拍廣告，她還把合照貼上微博，當中三嫂戚美珍也到場探班，夠晒恩愛。
採訪：王崇穎 攝影：黃文成