上月19日可說是地產界變天的日子，一手樓即死，二手樓玩完，地產界一夜間由天堂變地獄，最慘的是地產代理，即時大失預算，上月仍賺大錢的中大型行，要立即想辦法止血。
基於形勢急轉直下，某中大型行揸旗人最近召開緊急高層會議，商討對策，揸旗人喝罵：「早前都叫你哋唔好通過加薪建議，現在宣佈咗，收唔番，點搞好。」
大行急謀對策節流
揸旗人表示，要立即節流，煞停所有未來半年的開行計劃。又指以目前形勢估計，未來幾個月隨時慘過沙士，所以要求各區阿頭，喺未來3個月，最少減兩成人手，不過要做得高章啲，第一個月無數就出警告，第二個月又無，勸令停薪留職，總之唔好對外話炒人，要講到係員工自己選擇停薪留職。
他又說，中細型行都好麻煩，原因佢哋早前承租好多舖，現在如果唔開舖，賠定都賠死，所以死都要開，不過，佢哋開咗啲舖，都只有一兩個經紀坐舖。
與細行搶租盤生意
「家無買賣做，租盤都唔好放過，所以你哋要叫手下加強做租盤，實行同細行埋身搶。至於公關部，要出多啲唱淡樓巿稿，迫業主減價；高層就要接受多啲訪問，借機盡量叫準買家趁調整後快入巿。家阿爺喺內地做嘢，我哋內地嘅生意死到直。如果高層做唔到嘢，咪怪我無面畀。」他強調。
他最後強調，出得嚟行，預咗要還。早前公司有唔少董事有幾百萬元年薪，由下個月開始，個別董事會因負責區份蝕錢，欠公司逾百萬元，他日若好巿，照慣例會在應收佣金回扣，98年時就有董事全年無糧出。
何熊輝