"拜仁復勇「減乜都追」"
周末貼冷門幾次都唔得，卻又引證周中波多利冷，貼士得心應手；一條歐聯3串4和局全中有70幾倍，燃起追逐榜首的一剎那虛榮。同戰友講過，喜貼冷門只因好高鶩遠，望一矢中的，豐厚回報；日日中，係人都想，但係博熱門注碼要大，唔係小弟嗰杯茶，能在上游角逐，感覺已很好。但既然周末利熱，姑且推介一兩場，先捧拜仁大炒聖保利！正牌莊家驚死，開[-1]唔開[-2]，當然唔慌有得分，小注怡情者，我勸押落3.5球入球「大」仲有啲肉食；班波前次狂攻卻敗走史浩克04令我印象深刻，周中博佢哋[-1]，輕鬆炒巴素利得手；唔怕追寶尾，在下半季要狂追榜首多蒙特，今面對弱旅聖保利，試吓5:1同「主其他」波膽。
"祖爾走頭阿積士追失地"
緣份嘅嘢，勉強冇幸福！祖爾季初想返去英超教，點知硬畀阿積士留住，但見佢越教越冇心機，見球隊歐聯無法打入一、二名，近排聯賽狂失分，自己走頭不失為一條好漢；由助手法蘭迪保亞頂檔，即刻作客贏A米。我認為隊波喺荷甲同領先佢哋5分嘅燕豪芬有超班實力，乘信心番嚟，明天早場作客弱旅維迪斯，冇咗停賽嘅失靈入球機器蘇亞雷斯都夠殺，[-1]兼買埋4:1，5:1。
"國際賽日「共創未來」"
明天國際賽大日子要入馬場湊吓熱鬧，大摩馬房出動全倉近5分之1嘅絕大部份身價不菲嘅精英參賽，喺度用幾十字重拾吓往昔貼馬好日子，提供兩隻半冷大摩馬「軍事攻略」同「共創未來」買WP過關。
貼波貼馬都鍾意冷啲，好鍾意「共創未來」個馬名；何況虛分馬上季奇準慣排外檔場場不勝有位，上仗大墮後隨意衝一段走勢好曖昧，在港首次冇「披士」，主帥親征，跑一級賽，必打真軍！
"先來客利記射車仔上盤"
柏度接掌紐記真係好意外，有時腰纏萬貫嘅老細想嘅嘢，外人未必會估到，傷兵突多成績稍沉即請大眼仔曉頓食炒魷，呢個世界有時冇公義可言，實幹派未必可討老細歡心，睇吓柏度會唔會行運醫生醫病尾，我認為班波下半季有力入前8。但動盪之時，碰巧追數利記勢起，紐記主場冇運行多咯；單W唔夠食，射埋明天車仔作客熱刺，唔信前者主力逐步康復可以長期踢得咁差，熱刺唔係咁叻，但勝在士氣好，講硬淨，少讓平/半嘅車仔，有力反底。
"沙皇或打造阿奴3.8倍W"
後天深夜大日子，呢場從賭波值博率出發，小弟唔會用上提兩個客W串落呢場，會同佢單打獨鬥。
阿仙奴主場，今季我極少提供，但係作客就唔同，打突擊，憑個人細膩腳法及快速推進，仲煞食，值長追；拿斯尼初嚟英倫時，對曼聯入兩粒已露鋒芒，但家曝晒光，必被敵衞嚴防，屆時或由另一隻翼「沙皇」艾沙維建功立業也未定，唔賭下盤，唔賭[+1]，博冷W！太冒進？捧入球「大」嘞。
蘋果波神
語錄：強隊受挫折見回起，唔怕追寶尾；但要冒進啲，方能追回失地。