被稱係本港唯一嘅政治諷刺劇嘅港台節目《頭條新聞》，雖然出街嘅口碑唔錯，但新一輯播埋今個月就暫停。一直被質疑搞小動作嘅港台台長黃華麒噚日話，好珍惜呢個節目，稍後會捲土重來喎。議員何秀蘭聽到即時苦笑，驚嘆有人可以講出咁嘅邏輯，「用停播表示珍惜，真係匪夷所思」。
曾經因為撐港台運動成員踩上港台要求對話、唔止一次「撞啱」放假嘅黃華麒，噚日到立法會講述港台情況。何秀蘭話政府以「溫水煮蛙」陰乾《頭條新聞》，由每星期一集減到三個月十集，「都唔知仲有冇得做」，完全感受唔到台長所講嘅「珍惜」。黃華麒被問到口啞啞，就話停播決定係副台長張文新負責，佢冇插手干預。合約剩番唔夠三個月，睇嚟台長已經叠埋心水閃得就閃。