TCL通訊（2618）9月尾請咗「星級分析員」陸東做佢哋嘅獨立非執行董事，睇嚟呢鋪真係物盡其用！點解咁講？噚日華華拎份報紙揭吓，突然睇到一個陸東拎住部手機嘅平面廣告（圖），睇第一眼，仲以為部手機係「黑莓」，望真啲，原來係ALCATEL嘅智能手機，ALCATEL嘛，咪即係TCL自己嘅品牌囉！
先講部手機，根據TCL管理層之前介紹，呢部係佢哋第一部Android智能手機，會先喺歐洲推出，賣3000蚊樓下。如果拍埋喺iPhone同黑莓度，坦白講，唔算係好高端。再講，廣告所見靚仔到爆嘅陸東，經華華向見過陸東真人嘅同事進行嘅非正式調查，結論係─電腦執相。呢個技術的確係世界上十大偉大發明之一喎！