【上海直擊】由徐熙媛（大S）、吳尊同韓庚主演嘅電影《大武生》噚日喺上海進行拍攝，由於有閃婚嘅大S助陣，所以《大》片開拍以嚟都備受注目，電影公司仲廣邀香港傳媒上去探班，不過唔知係咪因為大S已經升格做咗俏江南集團嘅媳婦，所以電影公司就特別緊張，擔心傳媒去到現場會圍剿大S，所以噚日一早班記者去到現場時，竟然話唔俾影相，又話唔准問大S嘅私人嘢，搞到大家以為係大S耍大牌。
手患復發每日電療
幾經爭取後，電影公司終於安排啲演員企定定影相，大S嘅心情好靚，同記者有傾有講。之前大S嘅右手因為舊患復發，醫咗3個月復元唔夠5成，大S話右手傷及神經，家連手都舉唔起，即使同汪小菲拖手都要用左手，佢自爆因為覺得已近殘廢，所以曾想退出拍攝，佢話：「不過導演表示用左手打功夫也可以，現在我做了左撇子，開頭揸筷子都好難，雖然每日都要電療，但自己就沒有擔心。」
大S在《大》片扮演刀馬旦，佢話個角色好勇敢，為咗愛情唔會理世俗眼光，佢承認個角色同佢好似，至於有指佢出年3月會喺海南島擺喜酒，佢就話到家都未決定，一切要等過年放假時才慢慢商討，不過新婚嘅大S都禁不住喜悅，當現場記者恭喜佢時，佢甜到漏咁話多謝，仲話想生小朋友㖭。
此外，吳尊同韓庚喺片中扮演好兄弟，不過因為兩人首次合作，導演要佢哋兩個喺拍攝前互望30秒嚟醞釀默契。