郭晉安08年與太太歐倩怡誕下兒子郭令山（Brad），一直希望為兒子添一個弟妹。安仔昨日急不及待向大家報喜，宣佈太太懷第二胎，現有兩個月身孕。安仔說：「開心都嚟唔切，終於囝囝有個細佬或妹妹，如果湊夠個好字梗係最好。」
郭晉安06年跟歐倩怡（Cindy）在迪士尼樂園結婚，兩年後誕下兒子郭令山，安仔一直希望再為家庭添新成員，最近也不時傳出Cindy懷孕的消息，昨日安仔接受商台節目訪問時，興奮宣佈再榮升爸爸。
「湊個好字梗係最好」
無綫現播放安仔演出的處境劇《依家有喜》，認真應景，安仔開心宣佈剛剛知道太太有喜，他說：「有咗兩個月，其實一個月前有少少迹象，但未肯定，噚日去咗醫生度檢查，身體狀況各方面都好好。」安仔表示因開工關係，沒陪太太睇醫生，是太太致電報喜的。問到安仔反應如何？他說：「開心都嚟唔切，終於囝囝有個細佬或妹妹，如果湊夠個好字梗係最好，但冇乜所謂。之前傳佢有咗，其實未有，我唔係講大話。」
安仔表示今次是計劃之中，因大仔已兩歲返學，有自理能力，所以決定要第二個，他說：「太太上一胎好舒服，今次就嘔得好緊要，家每朝好似鬧鐘咁，但我都知唔會維持好耐，三個月左右。」安仔表示因工作很忙，預計農曆新年前才收工，他說：「明年3、4月或者會返內地拍劇，但BB出世嘅時間，我會爭取嗰段時間唔做嘢住。」
安仔表示會努力搵奶粉錢，也多得上次大仔有很多贊助。問到大仔知否將有弟妹陪他？安仔說：「我未同佢講住，但有一日同佢提過，佢好似聽唔到咁，冇乜反應，不過屋企人知道，大家都好開心。」
因為已有做爸爸經驗，所以安仔心情比較放鬆，問到會否胎教？他說：「會同個胎講吓嘢，但太太有啲口味轉變，鍾意食包類同牛肉，試過半夜叫我拎白飯佢食，話加啲豉油就得，真係食晒成碗。」安仔表示暫未改名，太太有增磅。安仔又搞笑說：「我嗰時喺內地拍劇兩個月，如果嗰時有咗，我都要問邊個o架！」
「我係最幸福嘅男人」
另外，安仔昨日在將軍澳電視廣播城拍《依家有喜》，他接受訪問表示太太預產期是7月，更直言自己是一個幸福的男人，他說：「兩個都夠晒數，如果係女，我就係一個最幸福嘅男人。」安仔笑言第二胎配合到天時地利人和，他說：「剛好外母退休，時間真係剛剛好，佢可以幫我哋照顧小朋友嘅健康，幫我哋減輕好多壓力。」
採訪：林妃