林曉峰（阿Lo）跟康子妮（Lily）轉眼間已結婚八年，安然度過所謂的七年之癢，早前帶同一對活寶貝到尖沙嘴品嚐法國自助餐，一家人齊齊預早慶祝結婚紀念日，兩位林公子更親手炮製甜品孝敬爹哋媽咪，令阿Lo同Lily冧到爆！
本月19日是林曉峰跟康子妮的結婚八周年紀念日，兩口子共同生活多年仍然恩愛如昔，問到阿Lo是否會時常搞點小浪漫帶Lily去嘆燭光晚餐？
乖仔扭計跟去街
阿Lo笑謂：「有咗佢哋兩個之後，都好少可以兩個人夜晚出街撐枱腳，家燭光晚餐都變咗燭光早餐，平時我哋送完佢兩個返學，就會一齊去拍拖食早餐，呢啲時間就係我哋嘅二人世界。」
阿Lo又指平日工作試到好的餐廳，都會記低然後待紀念日帶太太去品嚐：「我哋有張餐廳list，都係平時工作試過OK嘅餐廳，我知呢間餐廳出年3月就會結業，所以特登嚟食做個紀念。以前兩個仔仲細嘅時候，我哋都仲可以將佢哋放低畀媽咪或家姐湊住先，然後可以兩個人偷走出去玩，但係家佢哋大個知乜嘢事，見你哋想出街就會問你去邊，然後扭計話要一齊去！」
難捨囝囝搬開住
Lily邊餵大仔林寶食蟹邊說：「我成日諗佢哋家咁黐我哋，如果第時再大啲，有日佢兩個同我講話要搬開住，我真係會接受唔到！」難怪二人世界變成四人行，阿Lo跟Lily仍如此享受，阿Lo更趁機問細仔林熙：「你第時大咗係咪都仍然會同我哋住o架？」見林熙只笑不回答，阿Lo即謂：「我哋已經同佢哋講好咗，第時佢哋大咗，就買埋隔籬或者樓上樓下個單位，搬過去住，咁佢哋又有私人空間，我哋又可以成日見到。」問到阿Lo是否已準備好禮物給Lily？他坦言：「冇o架！我哋平時見到啱對方嘅嘢就會買，所以唔係特別節日都會送禮物嘅，反而我哋唔太着重係咪紀念日當日收到禮物。」
兩位林公子知道父母結婚紀念日在即，即嚷着要自製甜品送給他們，雖然整個過程均有師傅協助，不過Lily跟阿Lo收到這份由兩個寶貝獨家呈獻的禮物時，依然甜在心頭！
場地提供：LaBrasserie（馬可孛羅香港酒店）
採訪：譚倩宜 攝影：仇志德
