內地網警橫行，六四、民主女神等字眼一律被河蟹，內地13億人民不能提這些事，香港特首煲呔卻可以。由噚日開始，內地同胞可以在香港官方途徑知道今年參加六四集會人數創新高，中文大學有個新民主女神像。
煲呔以「香港特首辦」名義喺新浪微博大陸版開戶，消息噚日公佈，已有近萬名網友「關注」做粉絲。高官微博只係發佈官方消息，煲呔個微博都唔例外，所以微博噚日有煲呔出席2010年十大新聞選舉活動消息，附有一張佢企喺候選新聞名單紙牌前嘅相片。
內地網民驚為天人
呢段平平無奇嘅官方消息，原來內有玄機，因為候選十大新聞名單上，赫然有「六四21周年燭光晚會人數新高，民主女神像落戶中大」呢單新聞，一名澳門粉絲有此發現，留言大讚呢幅相係很好嘅圖，「夠大，不怕睇細節」。佢冇講明相中細節是甚麼，相信係唔想網警發現，出手河蟹。
今年六四多位香港藝人同記者喺微博暗講六四，結果通通遭河蟹，唔知內地網警幾時出手，八方難以估計，亦有可能煲呔睇到阿爺面色，自我河蟹。有粉絲噚日問煲呔，「香港特首辦」呢個微博係咪都享有言論自由，亦有人問「可以罵特首不？」
煲呔開微博，大部份港人懶理，但對內地網民嚟講，高官開微博卻係石破天驚嘅事，唔少人借題發揮，建議胡、溫同其他領導效法煲呔，甚至叫煲呔「覺得好就介紹濤哥也開吧」，澳門崔世安、上海韓正，連廣東省委書記汪洋都被網民點名，「不要等到調走了，還不清楚廣東有哪些粗口」。
粉絲提出不同問題
特首辦之前請咗專人打理facebook，開微博理應有份筍工待聘，唔少粉絲提出不同問題，「啥時候我們去香港不要辦通行證？」「甚麼時候可以收到翡翠台呢？」以下兩個期望，係內地以億計網民心底話，八方卻覺得強人所難，「你要告訴大陸官員甚麼是廉政，怎樣才廉政，貪污腐敗結果失去甚麼」。
mailto:[email protected]