鄭秀文（Sammi）11年前與古天樂因合拍劇集《寵物情緣》傳緋聞，兩人再合作拍電影《百年好合》時傳出愛火重燃，但最終她是回到許志安身邊，只不過一年多後，兩人也告分手，Sammi自此一直冇拖拍，直至明年1月她與古仔再度合演杜琪峯的文藝愛情片，在內地日夕相對幾個月，隨時有機再撻着。
鄭秀文與許志安離離合合多年，如今兩人都回復單身，據說男方早有復合之意，只等待女方首肯，但Sammi始終採觀望態度，安仔還要繼續努力，不過，他倆復合都可能會出現阻滯，因為明年1月Sammi接演恩師杜琪峯執導的文藝愛情片，戲中將會與前緋聞男友古天樂再譜戀曲，兩人日夕相對幾個月，容易再度擦出愛情火花。
尋找妹妹遇真愛
Sammi近年專注舉行演唱會及參與慈善工作，拍戲已少之又少，對上一部電影已是去年年頭與陳奕迅合演的《大搜查之女》。今次該片除了是由杜琪峯執導外，男主角是前緋聞男友古天樂，故相信也因而吸引她接演此戲，因一直有說Sammi對古仔依然很有好感。
據悉古仔與Sammi將會去四川拍攝這部愛情文藝片，劇情是講述Sammi的妹妹在內地一個森林失蹤，她千里迢迢去尋找妹妹，怎料在一個充滿神秘的森林遇上古仔，後來還得到古仔的協助去尋找妹妹，過程中發生很多奇怪事情，兩人患難見真愛，譜出動人戀曲。
杜琪峯昨日證實明年1月會再找古仔和Sammi拍愛情片，他表示：「家內地一係拍古裝，一係拍3D戲，純愛情戲好少，我同韋家輝覺得10年一個周期，2000年有一部《孤男寡女》，明年再嚟一部愛情戲，應該觀眾會接受嘅。不過部戲未決定係咪喺四川開拍，因天氣太凍，我怕Sammi頂唔順，你都知佢有哮喘，海拔太高嘅地方唔啱佢拍戲，所以要再搵適合嘅外景地。」
古天樂昨日被問到再度與Sammi合作，會否擔心又傳緋聞？他說：「工作嚟啫！我冇諗咁多嘢。」早前在杜琪峯拿院士當日，Sammi與古仔再度碰頭，問他再見舊緋聞女友有何感覺得時，他表示：「嗰日同佢冇乜交流，我都趕住走。唔好再問我感情問題啦！我唔會回應嘅！因為實在冇乜可以講。」
乾涸多年恨拍拖
11年前Sammi與古仔因為演出無綫劇集《寵物情緣》鬧緋聞，但當時因雙方都各自有另一半，戀情很快玩完，到他倆再在電影碰頭合演杜琪峯的《百年好合》時，兩人又火速再撻着，不過有傳Sammi難捨舊愛安仔，最終又和安仔復合，只可惜與安仔復合年幾，兩人還是因性格不合再度分開。分手至今，依然未有新愛情滋潤，她數度公開表示感情生活很乾涸，恨有愛情滋潤，只可惜一直沒有找到新對象，她的雙親和身邊好友都擔心她嫁不出。
採訪：葉雪
戀上古森林
Sammi甩拖多年乾涸到極，她明年與兩度傳緋聞的古天樂深入浪漫森林拍片，古仔隨時英雄救美，滋潤dry爆的Sammi。設計圖片
