闊別香港5個月嘅大摩亞洲非執行主席羅奇，噚日卒之蒲頭，原來，呢5個月佢返咗阿美利堅，喺耶魯大學教書，但有趣嘅地方係，上佢堂嘅學生，竟然有4成係炎黃子孫！
羅奇噚日喺亞洲協會嘅午餐會，同大家分享喺耶魯執教嘅點點滴滴。有「中國通」之稱嘅羅奇話，家係「中國世紀嘅開始」，所以，佢好自然咁揀咗NextChina（下一個中國）做講題，諗住向花旗國嘅莘莘學子講吓過去30年，中國點解可以由一窮二白變得咁強盛。點知，開班反應令佢好shock！羅奇話，報讀嘅學生有270人，反應理想，但奇怪嘅係，有4成學生嚟自中國，佢哋應該對自己國家嘅情況好了解o架，因乜解救啲學生山長水遠去到花旗國，聽個鬼子佬講番自己國家呢？原來係theywanttohavetheopportunitytodebatetheeconomy！（想有自由討論經濟嘅機會），呢點係內地做唔到嘅……
親口同溫總講 叫美國人慳啲
華華都係炎黃子孫，聽到個鬼佬咁講，一啲都唔shock，淨係覺得好悲凉。唔係咩，你睇吓趙連海同劉曉波，兩個就係因為鍾意討論、求真先搞到要坐監；如果喺大陸認真咁討論經濟，領嘢程度真係唔比佢兩位低o架！
講返羅奇，今年9月溫總到訪紐約嗰陣，佢再次向溫總進言，話美國嘅問題係美國人自己要慳啲使，而唔係將手指指向中國……唔知溫總聽完有冇覺得好感動呢？
李華華
mailto:[email protected]